Marcha atrás

De xemes en cuando entreténgome pensando en toles coses que tuvieron que pasar pa que tea yo equí agora. Tamién hai una versión a menor escala d’esti xuegu: tento de volver p’atrás nos temes de conversación hasta’l momentu más alloñáu posible nel tiempu.

Va yá dellos años, en 2006, taba yo pasando unos meses en Bélxica como estudiante Erasmus. Hacia la final de la mio estancia, un desconocíu agregóme al mésenyer (que daquella tovía usaba muncha xente). Entrugué-y quién yera y díxome que viera la mio direición nun mensaxe en cadena d’esos de si-nun-unvies-esti-mensaxe-a-venti-persones-daqué-terrible-va-pasate-esta-nueche y, como taba aburríu, decidió agregame “pa charrar”. Mui raro, sí.

L’asuntu ye que nun volví a falar con él, pero por mor d’esti yo conocí a daquién que taba buscando pisu en Salamanca y al que’l rarín aburríu-y dio la mio direición. Gracies a esta persona deprendí esperantu, llingua cola que diba trabayar años dempués en Países Baxos y, de no ser asina, nun diba conocer a otra persona que foi una de les razones principales pa que viniera a Alemaña. Y dende llueu, si nun viniera a Alemaña nun diba tar trabayando onde toi.

Hai otra serie de coses que tuvieron que pasar pa que yo tea güei equí. Cuando tovía taba nel institutu usaba un programa p2p nel qu’había un chat integráu. Ehí entamé a falar con un tal DerangedDutchman qu’un bon día me dixo: “Wanna take this to msn?”. Sonaba a cortexu cosa mala, pero por suerte nun lo yera: ficímonos ciberamigos y hasta quedamos una vegada pa dir a un conciertu en Madrí. Si nun lu conociera nun diba escoyer neerlandés na universidá, sinón griegu, y tampoco diba dir a trabayar a Países Baxos n’esperantu. Equí aúnense yá esta llinia y l’anterior.

Agora que me paro a pensalo un migayu más, decátome de qu’esi programa p2p tenía sales y yo taba na de Queen. O seya, que si nun me prestara Queen nun diba conocer al tal DerangedDutchman, y Queen escúcholo dende qu’un amigu de la escuela n’Arxentina m’emprestó una cinta. Y si mios pas nun decidieran dir a Arxentina, quiciabes que nunca me diera por escuchar Queen nin diba conocer al DerangedDutchman nin diba deprender neerlandés, nin diba trabayar en Países Baxos nin venir dempués a Alemaña. Con que, de dalguna manera, mio ma nun va poder quexase de que toi lloñe porque, en parte, si nun mos llevaren de vuelta a Arxentina, quiciabes que tovía taba perhí cerquina. O quiciabes non, quiciabes taba tovía permuncho más lloñe.

Leave a Reply

Your email address will not be published. Required fields are marked *