Anulación: la segunda moza

He reconocer que la mio esperiencia con muyeres nel planu sentimental dexa muncho que desear. Llueu nel trabayu, p’amistá o pa la charra ensin sustancia nel ascensor nun se me dan tan mal. Pero no primero tengo delles dificultaes pa entendeles y pa faceme entender.

Depués de la mio primer moza, que m’aguantó ente cuatro y seis meses, nun tuvi más qu’un amagu de moza unos años más tarde. Yera la época’l mésenyer, na que la xente yera quien a desendolcar rellaciones enteres, dende los entamos, pasando polo cotidiano del mediu hasta los hecatombes del final, too per Internet. Yo a esta rapaza conocíala porque xugaba al sófbol nel únicu club asturianu de béisbol y sófbol que nun yera’l de mio. Yo taba nel San Lázaro d’Uviéu y ella, n’El Llano de Xixón. Anque nos enfrentábemos davezu (por eso de que nun había otra xente colo que xugar), l’ambiente yera bonu ente toos. Un día, nun sé cómo, agreguémonos al mésenyer y entamemos a charrar. Ella yera perguapa y a min, cobarde pero abellugáu detrás d’una pantalla, nun me paeció tan difícil dicí-ylo. Asina di-y a entender que taba interesáu y ella, pa la mio sorpresa, nun salió corriendo. Yo tenté de facela entrar en razón: sumíu na inseguridá de l’adolescencia recordé-y que nun yera guapu nin tenía un cuerpu atléticu y, bien visto, yera más bien daqué pardillu. Alcuérdome perfeutamente de la fras que punxo depués de dicir, nuna lletra verde fosforescente en cursiva, que lo que cunta ye lo de dientro: “y nel to casu, con crecessss”.

Animéme pues a dir a Xixón a vela. Nun sé qué ficimos. Asumo que pasiar perhí y tomar dalgo. Namás que m’alcuerdo de los últimos minutos enantes de xubir al tren de vuelta a Uviéu: tábemos sentaos nun bancu, yo cola espalda apoyada nel respaldu y la cabeza gacha y ella, sentada de llau intentando averáseme. Nun-y fici casu. Taba pernerviosu y pudiéronme la vergoña y la inseguridá. Nin un triste besu intercambiemos. Tou coloráu como me ponía siempre neses ocasiones xubí al tren y torné a casa.  Esa nueche, si nun m’equivoco, alcordemos per mésenyer que tábemos saliendo. El patéticu resultáu del primer alcuentru a soles tuvo una consecuencia inesperada que m’ayudó a escaecer esi sentimientu de fracasu y hasta-y lo cunté a mio madre.

A la otra selmana había partíu en Xixón y fui a velu, namás que pa vela a ella. Sorrióme dende lloñe, diome un besín nel papu y intercambiemos tres o cuatro frases. Esi día noté que lo nuestro nun yera nada. Pela nueche, otra vez per mésenyer, lleguemos a la conclusión de que mos precipitáremos y que tábemos meyor d’amigos. Entós, di anuncia a mio madre de que lo que-y cuntara quedare en nada y suxerí que lo viéramos más como una anulación que como un divorciu.

Leave a Reply

Your email address will not be published. Required fields are marked *