Un añu más, antroxu

Una vegada más llega l’antroxu. Nestos últimos años, o eso creo, nun me disfracé, quitando acaso la edición especial que tuvo llugar el branu pasáu en Cangas.

De neñu, eso sí, nun había febreru ensin preparación de teles, peluques y demás accesorios. Cuando en segundu de primaria cambié d’escuela, enteréme de que nel mio nuevu centru facíen un desfile de carnaval y la emoción foi muncho mayor qu’enantes. A mio pá y a los sos fíos ocurriósemos que sedría una especie d’espectáculu nel que la xente amosaba’l so antroxu y facía un numberín. Mio hermanu y yo, que díbemos de payasos, preparemos asina un par de truquinos de neños que nunca nun llegamos a presentar énte naide: resultó que’l desfile yera namái eso, un desfile. Los escolinos andaben per una pasarela construyida con meses cubiertes por un papel perllargu, y yá. Foi una deceición importante. Pero pa los años siguientes ya sabíemos a lo que díbemos, y el eventu pasó a convertise, xunto col día’l bollu, nunu de los ḥailaits del añu escolar.

Al añu siguiente repetimos disfraz –gran error–, anque hai de dicir tamién que taba mui llográu y había que rindi-y homenaxe. Mio güela ficiera hasta l’últimu detalle del traxe cola máquina coser. Nesa ocasión la única que camudó d’antroxu foi mio hermana, que obligaran al añu anterior a dir d’enfermera, pero agora yá podía sacar a rellucir la que diba ser la so vocación profesional de toa una dómina y, al mesmu tiempu, disfraz en varios carnavales siguíos: princesa. Sobre esto quiero destacar sólo que toi convencíu de que mios güeles, anque duldo que lo almitan, teníen nel fondu la esperanza de que realmente se convertiera na escoyida del príncipe d’Asturies.

Un añu mio hermanu y yo fuimos perarguyosos de pareya de vieyos, bonísimo, y n’otra ocasión fui de Steve Urkel. Esti disfraz pasó a ser el favoritu de mio ma y enxamás dexará de selo.

Nel desfile había tamién premios. Yo gané sólo una vegada, gracies, cómo no, al trabayu de mio güela, que me cosió un traxe azul claru d’una pieza pa presentame, col pelo llargo y atao en forma de fonte no alto la cabeza y un chupu descomanáu colgando del pescuezu, de bebé desproporcionáu. Nunca olvidaré esi añu. Non pol premiu sinón porque foi la vez na que mio hermana s’antroxó de Melanie C pa la so fiesta de cumpleaños, pero en pasando unes hores dió-y vergoña y entamó a dicir que diba de deportista. D’esi día hai una semeya ayures na que se me ve a mi de bebé, a delles amigues de mio hermana y a ella amosando gayolera’l papel desplegáu de la cinta de les Spice Girls.

Leave a Reply

Your email address will not be published. Required fields are marked *