Una hora menos en Canarias

El fusu horariu oficial n’España ye l’européu central. Central. Nun sé qué manera de ver el continente tien la xente, na qu’España ta nel centru d’Europa.

Esto remóntase a 1940, cuando a Franco se-y ocurrió que si teníemos la misma hora que l’Alemaña nazi y la Italia fascista, díbemos ser igual de bonos que ellos. Foi entós cuando s’adelantaron tolos relós, y ehí quedaron (menos pal horariu de branu: otra fatada). Cuando más llama l’atención esto ye al pensar qu’España comparte hora con países tan alloñaos como Polonia o Albania.

El fechu de que n’España s’use esti fusu horariu ye la razón de qu’amaneza más tarde y, llóxicamente, atapeza más sero. Asina, toles actividaes del día desplácense una hora y por eso les escueles nun abren hasta les ocho y media o les nueve de la mañana y xintamos a les dos envede a la una. Como tamién entamamos más tarde a trabayar, tenemos que quedar más tiempu pa facer les ocho hores. Pa enriba, como asina la xornada se fai insoportablemente llarga, hai que la dividir, y ente les dos y les cuatro o les cinco, ta too pesllao. Too esto afeuta a la productividá llaboral y, sobre too, a la calidá de vida de les persones. Cuando yera neñu, mio pa volvía de trabayar a les ocho y media o les nueve y, obviamente, nun-y quedaba tiempu pa facer nada más. Ye terrible.

Nel situ nel que trabayo collaboramos con un estudiu de grabación que ta asitiáu en Barcelona. Ye práuticamente imposible coordinar horarios pa que yo pueda acompañar les grabaciones per Internet: Hasta les diez nun hai naide, a la una voi yo a comer, coincidimos ente la una y media y les dos, a les dos marchen ellos hasta les cinco y a les cinco y media marcho yo pa casa. Ellos siguen trabayando hasta les siete y media o les ocho y yo tengo tol restu’l día llibre.

N’España esiste hasta una asociación que busca la regulación de los horarios per parte de la Xunión Europea. Si dalgún día algamen los sos oxetivos y España vuelve al horariu que-y correspuende, entamaremos a trabayar un pocoñín más ceo, comeremos a hores más sanes, la xente tendrá tiempu pa facer un pocu de deporte y quedar con amigos ente selmana y por fin, por fin, dexaremos de sintir setecientes vegaes al día “Una hora menos en Canarias”.

One thought on “Una hora menos en Canarias

  1. Daniel

    No soi a decir si toi pro u escontra, pero pueu dicir que paézme que cambear l’horariu y entamar el trebaju una hora antes jaz que entarajilar un trebaju coordináu a distancia sea entovía más complicáu.
    Encontóo, si se jiciera eso, cudo que l’aportamientu del horariu de branu no sedría tan interesante, porque lo ideal es que l’hora oficial correspuenda con una hora menos que la del fusu solar rial.

    Reply

Leave a Reply

Your email address will not be published. Required fields are marked *