La selmana negra

Que de neñu yera bastante consentíu nun ye nenguna novedá pa los que me conocen. Mio ma diz siempre que nós, ye dicir, mios hermanos y yo, “vinimos tan grandes” de tanto comer cereales. Yo yera de Frosties, mio hermana de Smacks o Estrellitas, y mio hermanu de Chocos, anque tamién ye verdá que col tiempu fuimos ampliando los nuesos horizontes. Con eso y la pizza de rigor los vienres, nos alimentamos los tres. Cuasique nin si nos pagaben yeren a facenos comer verdura. Fruta quiciabes un poquinín, pero tampoco nada que s’averara a lo que pue considerase saludable.

Nel primer añu depués de tornar a Arxentina, mio ma decidió nuna fatídica fin de selmana qu’eso nun podía siguir asina y decretó lo que nel consciente coleutivu de la familia pasó a denomase La Selmana Negra. Foi una selmana más bien escasa de díes, na que tol mundiu diba comer verdura como fuera. Mio güela, que siempre vivió con nós y yera la que cuasi siempre cocinaba, fizo esfuercios sobrehumanos pa tentar de facer daqué que mos convenciera, con un ésitu deceicionante. Recuerdo, eso sí, que nuna de les primeres comides llegué a pensar “nun ta tan mal esto de la verdura, pa min que podría avezame”. Pero nun duró. Tengo pergrabada na memoria, si non yá na retina mesma, la semeya de mio ma garrando’l tenedor del mio platu con un bocáu de zapallito relleno y metiéndomelu na boca a la fuercia. Nun yera yo nengún bebé al qu’haya que da-y de comer, pero negábame a comer eso y mio ma nun pudo más y tomó cartes nel asuntu.

La selmana negra pasó y poco camudó, énte la frustración de mio ma. Pero munchos años depués, nun sé si mios hermanos tamién, propúnxime yo solín ameyorar la situación. Con 19 años comí la mio primer ensalada y entamé a mercar fruta toles selmanes. Ye una vergoña, sélo, pero más val tarde que nunca. Los zapallitos rellenos, eso sí, tovía nun soi pa con ellos.

Y vive Dios que los mios fíos nun van comer como lo facía yo.

Leave a Reply

Your email address will not be published. Required fields are marked *