¿Y agora, qué?

Una entruga que se faen munches persones en finando los sos estudios na universidá ye la de: ¿y agora, qué? Alcuérdome de que cuando taba nel últimu cursu de carrera vieno un ex-alumnu a dar una charra sobre lo que fizo él y cómo llego a onde taba entós. Prestóme pola vida escuchar aquello, non tanto por que’l bon home tuviere grandes dotes d’orador, sinón porque yo tamién vía alantre de min un gran furacu negru d’incertidume. Sicasí, d’esa charra salí con una idea mui estremada de la que tengo anguaño.

Si yo pudiera falar con los qu’agora tán finando los estudios, como fizo aquel con nosotros, diba dici-yos unes cuantes coses, quiciabes de calter más filosóficu que profesional, qu’esti home nun mentó.

Yo diba dici-yos que la vida nun ye lo que munchos nos imaxinamos: dir a la escuela, a la facultá, topar un trabayu, mercar casa, coche, tener fíos y morrer. Nun hai traxedia más grande que topar el trabayu pa tola vida a los ventitantos años. Ún tien d’esfrutar los años mozos (y los non mozos tamién). Anque agora piensen qu’un trabayu fixu-yos va dar seguridá, lo que quiciabes más sientan con ello ye aburrimientu, desesperación y falta de perspectives. Pa la seguridá hai tiempu tamién más sero. Nun creyo qu’un estudiante acabante de salir de la universidá tenga qu’enfotase demasiao en topar dalgo “no suyo” de sutrucu. Más bien podía aprovechar esi momentu pa viaxar, deprender coses nueves, vivir esperiencies interesantes… Y eses coses tienen tantu valir qu’al cabo’l dineru pasa a segundu planu (onde tenía que tar siempre). Y tovía si tienen “suerte” y atopen un bon trabayu poco depués de salir de la universidá, naide-yos quita de dexalu tres, cuatro, cinco años depués pa entamar otros estudios o facer cualesquier cosa que-yos pete, como poner una pastelería o dedicase a facer madreñes.

Paezme que, sobre manera n’España, reina una concepción daqué equivocada al rodiu de lo que ye la universidá: muncha xente paez pensar que ta pensada pa formar profesionales, cuando l’enfoque que tien ye más bien científicu. Los programes de FP formen profesionales, lo que ta perbién, y la universidá, científicos (tamién nes disciplines d’humanidaes).

Yo recibí los mios primeros encargos de traducción yá enantes de finar la carrera. Una collacia de clase díxome daquella: “¿Pero tu cómo aceptes? Si tovía nun yes traductor”. Un traductor, como munches otres coses, nun lu fai un papel firmáu pol rei. Los estudiantes de traducción son traductores cenciellamente porque se dediquen a la traducción d’una manera consciente y duradera con un enfoque académicu. Si va cien años nun había estudios de traducción: ¿quier dicir eso que nun había traductores? Obviamente, non. Los estudios son al cabo una fase más na creación percomplexa d’una personalidá, d’una identidá. Lo que depués se faiga con ello ye otra cosa.

Sobre too nesta dómina, los estudiantes necesiten esperanza pal futuru. Y a ellos prestábame dici-yos: tenéi la esperanza de nun topar un trabayu perfectu l’añu que vien, porque eso va obligavos a salir de casa, del país, a ver mundu y descubrir coses. Pue que lo paséis un pocu mal dacuando, pero na vida tamién tien d’haber d’eso: si non nun ye una vida equilibrada. Y sabéi qu’al final, too sal siempre bien. Que si tovía nun ta bien, ye que tovía nun ye’l final.

Leave a Reply

Your email address will not be published. Required fields are marked *