Única na historia

Préstame inventame frases qu’enxamás nun dixera naide en tola historia de la humanidá. Si ún se para a pensar en toles frases que diz ún diariamente, en tola xente qu’hai nel mundiu y en toles frases que dicen ellos nun día, yá nun paez una cosa tan cenciella. Por exemplu, ye bastante poco probable que daquién tenga yá dicho dalguna vegada “Los dos mil esperteyos que xintasti ayeri diben tar meyor con un migayu zucre”. Ye una fras única na historia, que se diz pronto.
Lo meyor ye cuando asocede ensin meditalo. Quien aguanta’l tiempu suficiente conmigo pue sintime dicir, depués d’una fras cualquiera y una pequeña pausa “De xuru qu’eso tovía nun lo dixera naide”.
Pa güei, por embargu, voi conformame con ver una cosa qu’enxamás nun viera enantes: una paisana nel tren percomiéndose una mazana entera, con semilles y too, ensin dexar namái que’l rabín.

Leave a Reply

Your email address will not be published. Required fields are marked *