Kiva

La caridá ye una cosa mui lloable, pero nun siempre la más afayadiza, sobre manera si s’entiende nel sentíu tradicional de dar perres o bienes a los más probes. Nun ye que tea mal, sinón qu’hai coses meyores si ún quier echar un gabitu a los que tan en situaciones más enguedeyaes que da-yos comida pa un día y non los medios pa consiguir lo de l’otru día.

Cuando trabayaba faciendo padrinos pa Plan, prestábame desplicá-y a la xente qu’enantes que donar 100 euros d’una vez a una ONG, pagaba más la pena facese sociu por una cantidá muncho menor de dineru pagada de forma regular, anque fuere namás que pa un añu. Esto da estabilidá a los ingresos de la organización, que poro pue planificar los sos proyectos d’una forma muncho más efectiva no que cinca’l presupuestu.

Va unes selmanes topéme n’Internet con una plataforma de donativos un poco aquello. Nun se trata exactamente de dar dineru, sinón más bien d’emprestalo. Llámase Kiva. El sistema ye esti: los beneficiarios de l’aida, homes, muyeres y grupos de los países en desendolcu piden un créditu y despliquen pa qué necesiten les perres. La mayoría son comerciantes que quieren ampliar el so negociu con más ufierta o, por casu, un llocal más afayadizu pal so proyectu empresarial. Los que dan l’aida, persones de los países desendolcaos, miren los proyectos y escueyen el que más-yos preste, porque-yos paez una bona idea, s’identifiquen cola persona beneficiaria o lo que sía. Darréu contribuyen cola cantidá que quieran p’algamar la suma que necesita la persona. Cuando se tien axuntao esto, entrégase-y al beneficiariu, qu’entós pue entamar col so proyectu y que tien un tiempu determináu pa devolver el dineru pocoñín a poco. Polo xeneral finen de devolvelo nun añu.

La idea d’esti sistema ye dar un votu de confianza a xente que, d’otra miente, nun diba poder aportar enxamás a un créditu por falta d’avales o garantíes de repagu. Los microcréditos (los de verdá, non los créditos pequeños que se dan a la xente de países ricos pa que se vayan de vacaciones) básense xustamente neso: en nun mirar tanto pa la probabilidá de que lo devuelvan porque, al cabo, ye relativamente pocu dineru. Sicasí, en Kiva devuélvese un 98,94% de tolos emprestos que se faen, que ye más de lo que se pue dicir de les hipoteques que dan los bancos n’España.

Tolos nuevos miembros de la plataforma reciben 25 dólares de créditu de Kiva pa donalos al proyectu que más-yos preste. Y esa primer vez nun cuesta nada. Nada. Ye interesante polo menos pa ver cómo funciona. Del mio primer emprestu, de 25 dólares, recibí unes selmanes depués la primera devolución, de 1,87 dólares: ¡un 7,48%!

Leave a Reply

Your email address will not be published. Required fields are marked *