Histeria femenina

Munches veces, la realidá supera a la ficción. Nun fai falta inventase hestories gracioses, interesantes o anecdótiques: basta con echar una güeyada al pasáu.

Hipócrates foi quien dio nome a una enfermedá que diba espardise muncho nel sieglu XIX: la histeria. Esta palabra provién del términu griegu pa “úteru”, y ye que Hipócrates, como la mayoría de la xente de la dómina, pensaba que l’úteru diba pasiándose por dientro’l cuerpu la muyer, causando estragos na so salú de maneres mui variaes.

Un par de milenios depués de recibir nome, la histeria foi descrita con más detalle por un médicu del sieglu XIX: espublizó un artículu con una llista de 75 páxines de síntomes que podíen asociase col mal de moda y cuidóse de finar el so testu afirmando que la llista tovía taba lloñe de tar completa. Eso, claro, permitía achacar cuasimente cualesquier cosa a la histeria. Y paez que foi lo que pasó, porque de sutrucu un cuartu de les muyeres pasó a ser víctima de la nueva dolencia. Ente los nicios más nes d’histeria taben el nerviosismu, el deséu sexual, la velea, la irritabilidá, y l'”inclín a causar problemes”.

El primer tratamientu que s’emplegó foi’l masaxe pélvicu, que practicaba’l médicu de la enferma. La muyer sentábase na consulta y el paisanu frotába-y los xenitales hasta qu’algamaba’l “paroxismu histéricu”, conocíu anguaño como orgasmu. Magar qu’esta técnica paecía dar resultáu, presentaba dellos inconvenientes: d’uno, había que lo repetir davezu, yá que se trataba d’una enfermedá crónica, y, d’otro, esta xera resultaba fadiosa por de más pa los médicos, ente otres coses porque a veces les pacientes tardaben hores n’algamar el paroxismu histéricu.

Como tolos tratamientos, el de la histeria foi ameyorándose col tiempu. El masaxe pélvicu pasó a tar a cargu de les parteres, que s’especializaron nesa técnica, y amás diseñáronse sillones o sofás especiales que permitieren un accesu más cómodu a les zones d’interés pal tratamientu. Más alantre, comenzaron a crease dispositivos qu’aceleraben el procesu de forma importante. Yeren n’esencia masaxeadores eléctricos que se posaben sobre la pelvis de la paciente y vibraben. Les muyeres fueron a la consulta de la partera a que-yos aplicaren esti modernu tratamientu hasta que la electricidá, que se reservare nun primer momentu pa la industria y el usu profesional, llegó a les cases y el so emplegu domésticu se xeneralizó.

Nos catálogos d’electrodomésticos d’entamos del sieglu XX (dellos con eslóganes tan nidios como “l’ayuda que toa muyer sabe apreciar”) puen atopase, xunto a ventiladores, aspiradores y máquines de coser, vibradores de varies pieces. Polo xeneral teníen un motor y dellos recambios p’adaptase a les necesidaes de caúna. De fechu, los vibradores entamaron a usase nes cases 9 años enantes que l’aspiradora y 10 años enantes que la plancha eléctrica.

Leave a Reply

Your email address will not be published. Required fields are marked *