Besinos a un euru

Siempre digo que les beques que recibía pa estudiar tardaben demasiao en tramitase, pero la cantidá en sigo yera abondo pa cubrir tolos gastos que tenía. Sicasí, facía falta una planificación escrupulosa pa nun llegar afogáu a la fin del cursu. Foi asina como entamé a facer los mios presupuestos n’Excel. En setiembre facía una tabla na que se detallaben tolos gastos del añu: una cantidá pal arriendu, otra pa Internet, otra pal móvil y, sobre manera, una cantidá pa la selmana. Nel primer añu foron 40 euros selmanales, llueu pasaron a 45 y nel caberu cursu, 50. Esi dineru metíalo na cartera’l llunes, cuando diba polo xeneral a facer la compra. Nun solía gastar más de 15 o 20 euros pa eso y tolo que quedaba yera pa esa selmana. Si comía demasiaos pinchos o descuidaba’l dineru de dalguna otra manera, nun quedaba muncho pa la fin de selmana y eso me sirvía de llección pa la otra selmana, pa nun gastar tanto. Asina viví los cuatro años de la carrera y tolos que vinieron depués tamién. Anguaño tengo una tabla más moderna, fecha en Calc d’Openoffice, y muncho más complexa, onde s’inclúin los gastos pal tren, pal ximnasiu, el neñu que tengo apadrináu y la cantidá que tresfiero tolos meses a la cuenta que me fici p’aforrar pa cuando tenga un fíu.

Anguaño, y por suerte, puedo facer frente a contratiempos económicos menores ensin qu’ello suponga un esbarafuste total de toles cuentes. Pero cuando taba na universidá, esto nun yera asina. Una vez cascó’l mio reproductor d’MP3 y vime desesperáu al nun poder escuchar música camín a clase, na ducha, al cocinar, etc., como fici tola vida. Y como nos mios presupuestos nun taba previsto que me gastara 40 euros nuna cosa tala, ocurrióseme otra cosa: organicé una campaña que nomé “Besinos a un euru”. Fici una páxina web na que desplicaba la situación y na que pidía a la xente una pequeña collaboración a cambiu d’un besín d’agradecimientu. La idea paeció facer gracia a non poques persones, y delles veníen pa mi nos pasiellos de la facultápurríenme un euru y estiraben la cara amosando’l papu pa que-yos diera’l so besu. Dellos foron inclusive al bancu pa faceme una tresferencia y tuvieron que responder ente la entruga pol conceutu: “Ehh… besinos a un euru”. Lo que nun m’esperaba yera que Santi mercare cinco besinos y mio ma, venti. Tuvi que saldar la mio deuda con ellos na siguiente visita a Asturies, onde fui nel Alsa de siempre escuchando música nel reproductor d’MP3 que tanta xente m’ayudó a consiguir.

Leave a Reply

Your email address will not be published. Required fields are marked *