2XL

Creo que les dos úniques vegaes que celebramos Navidá con otres families fueron una colos venezolanos y otra con Stella y Miguel. Stella y Miguel vivíen col fíu Luismi nun edificiu grande cerca de nosotros. El salón tenía puertes de madera y un cristal tresllúcidu y taba dividíu en dos partes pente medies d’una suerte de puerta corrediza. Esi cuartín qu’había del otru llau yera onde Stella me daba clases d’inglés.

Esi añu nun sé si cenamos xuntos o non, pero sí recuerdo que’l momentu de dar los regalos foi ellí. Los mayores zarráronse nel salón y nun nos dexaben entrar con dalguna escusa, dalgo como que si entrábemos nun diba venir Papá Noel, que taba pa llegar. Supi que taben envolviendo paquetes porque se reconocíen les figures al traviés del cristal esi que deformaba lo qu’había del otru llau, pero nun quixi desaniciar la ilusión y quedé xugando cola mio hermana a mirar peles ventanes pa ver si víemos a Papá Noel llegar nel so carru, hasta qu’efeutivamente lo vimos. Tábemos convencíos.

Cuando por fin pudimos entrar a ver los regalos caún foi a abrir el de so. A mi regaláronme un robot nomáu 2XL. Yera pequeñu, azul y gris. Funcionaba con unes cintes temátiques y cuando se lu encendía entamaba a falar y los güeyos brilláben-y con una lluz colorada. El xuegu consistía en dir respondiendo a les entrugues que facía por aciu de los tres botones que tenía na parte inferior. Según si la respuesta yera correuta o non, siguía diciendo una cosa o otra. Pero lo primero que anunciaba depués de cada entruga yera, obviamente, si la rempuesta taba bien o non. Poro, yera fácil facer trampes: namái que dicía “Siéntolu”, podía calcase ún de los otros botones y automáticamente oyíase’l final de la felicitación pola rempuesta correuta y así siguir xugando.

Tamién entamamos a poner la cinta del revés, conque s’oyía tolo que dicía tamién al revés. Fízonos siempre muncha gracia cómo sonaba cada vegada que dicía ahora nel llau principal: aroa.

Leave a Reply

Your email address will not be published. Required fields are marked *