La peonza

El tamagochi foi namái qu’una de les munches modes qu’hubo ente la xente de la mio edá nos años nos que tuvi na escuela. Anque nésa nun participé por razones de fuerza mayor (los mayores), otres téngoles con munchu cariñu n’alcordanza.

Ye’l casu, por exemplu, de la peonza (n’Arxentina y na mio casa, trompo). Nun sé en qué añu foi, pero tol mundu entamó a xugar con peonces. Nun yeren cares y mercábense nel quioscu. La de mio yera de Caunedo, l’eternu quioscu que taba cerca de La Ería y que nuna de les mios últimes escursiones al pasáu vi zarráu y reemplazáu por dalguna cosa ensin alma. Pa evitar que se dañaren nos combates (una manera de xugar yera lluchar con otros pa derribar les sos peonces cola propia) solía ponése-yos una chincheta nel taquín superior, anque los más espertos teníen peonces ensin esi tacu. El mio hermanu tenía una d’eses, y creo que por eso me paecía que yera de los que sabíen de peonces.

Yo, como munchos otros, pinté la mio peonza, creo que de coloráu, azul y mariellu, en sentíu horizontal, siguiendo les marques que tenía la madera, como unos riegos qu’arrodiaben el cuerpu la peonza. Nun sé por qué, pero creo que’l mio hermanu pintara la so peonza colos colores de la bandera d’Arxentina, anque tamién me da la sensación de qu’él nun diba aprobar que se pintaren. Tendré que-y lo entrugar.

Había dellos que simplemente xugaben a faceles xirar y, si acaso, a ver quién la facía xirar más tiempu. Pero la modalidá de combate yera yá otru nivel. Ún llanzaba la so peonza y, darréu, l’otru la suya de manera tala que tirara la primera. Lo más noble yera que la segunda s’averara xirando y se metiera na trayeutoria de la primera con una velocidá y una estabilidá mayores, pa esbaratar la primera. Había dalgunos, sicasí, que llanzaben la segunda peonza direutamente a la primera pa la facer parar dende enriba. Eso nomábase picar y yera necesario determinar al entamu del xuegu si valía picar o non.

Leave a Reply

Your email address will not be published. Required fields are marked *