Los güelinos entrañables

Nel tren nel que viaxo tolos díes, esi que me tuvo ayeri más de dos hores esperando, conozo una parte importante de la xente qu’hai. Porque eso suel pasar, qu’ún comparte rutines con desconocíos ensin nome hasta que se convierten en xente tamién ensin nome, pero daqué más conocío. A falta nome, nun ye raro que se-yos dean (qué se tan impersonal) nomatos. Asina, nel mio tren viaxen El peláu, El peláu 2 (alies El místicu), La de la mala lleche, El banqueru turcu, El de la música alta, El obreru rusu o El estiráu.

Pero los que güei mos ocupen son Los güelinos entrañables. Ye una parexina de xente mayor (vamos ser educaos) compuesta por un home y una muyer. En realidá él nun va nel tren, y eso ye lo que los fai especiales. Cuando yo llego, siéntome delles veces nun llugar y téngolos alantre, conque nun sé cuánto tiempu lleven ehí. En pasando un ratu, cuando falten unos poquinos minutos pa que cole’l tren, el paisanu llevántase, da-y un besu a la muyer, y marcha. Los dos quédense mirándose mentres él s’alloña y vuelven a saludase cola mano, caún a un llau del cristal de la ventana, pero mui cerca en munchos otros sentíos.

Depués, ella saca un llibru del maletu y llee.

Leave a Reply

Your email address will not be published. Required fields are marked *