Sángüich de lenteyes

Mio ma siempre diz que los mios hermanos y yo medramos por mor de los cereales. Refierse con ello a que nos alimentábemos abondo mal: malapenes comíemos verdura, pero sicasí anguaño somos los tres grandes y sanos.

Ye verdá que nos mimaben abondo pa la comida, quiciabes demasiao. Más d’una vez a la selmana había milanesa (filete empanáu de pitu) con puré patates y la pizza de los vienres pasó poco a poco a ser la pizza de toles nueches nes que a naide se-y ocurría nada meyor. Curiosamente, nunca xintamos pizza, creo que ye porque’l mio hermanu la consideraba comida de nueche.

Había munches coses que nun nos gustaben y otres munches que nun gustaben a unos o a otros. La mio hermana nun yera pa cola yema’l güevu, yo nun podía nin goler los plátanos y al mio hermanu nun-y prestaben un res les uves pases. A propósitu de les pases: en mio casa llamáronse siempre pasas de uva, y recientemente enteréme de qu’eso nun se diz n’España. Nos últimos años, ensin embargo, emplégase más el términu cataciones. Esto vien de qu’unes Navidaes, cola mesa dulce puesta depués de la cena, el mio hermanu foi a prebar unes bolines de chicolate qu’había nun bol diciendo: “Vamos a catar…”. Resultó que yeren uves pases bañaes y tuvo dir al bañu a cuspiales. Dende entós, catación ye sinónimu de pasa o, según el contestu, de comida poco agradable. Yo, anque había coses que nun me gustaben, delles veces buscaba la manera de les comer. Anguaño préstenme les lenteyes pola vida, pero daquella facíame con elles bocadillos de pan Bimbo pa podeles comer.

Va poco cuntóme la mio hermana de daqué que diba cocinar y yo díxi-y: “Pero si nun te gusta”. La so rempuesta foi: “Fede, pasaron munchos años y toos medramos y maduramos”. Pue que medráramos por mor de los cereales, como diz mio ma, pero lo de madurar ye pa mio idea cosa de la vida, ensin más.

Leave a Reply

Your email address will not be published. Required fields are marked *