La Tierra Güeca

Esiste una teoría que diz que la Tierra ta güeca y que nella vive una civilización de seres intraterrestres. Según dellos defensores d’esta hipótesis, habría nel centru la tierra un sol pequeñín que los alluma y, pa otros, viven na escuridá de los túneles soterraños. Toos, sicasí, paecen coincidir na idea de que les dos entraes principales al interior de la Tierra s’alluguen nos polos norte y sur de la tierra. Este entraes nun sedríen les úniques: hai quien diz que hai otres en París, Montreal o l’Amazonia.

En 1887, cerca d’un llugar nomáu Banjos, en Barcelona, unos llabradores vieron dos neños salir d’una cueva. Teníen un aspeutu raru y dalgunos describiéronlos como una mestura de races. Según dicen, teníen traces típiques de la raza negra, pero la piel d’un color verde y güeyos azules y resgaos. Falaben una llingua desconocía y la tela colo que taben feches les sos ropes yera desconocío dafechu. Negábense a comer hasta que-yos ufiertaron fréxoles y finaron en manes d’un xuez nomáu Ricardo de Calno. El neñu morrió poco depués, pero la neña llegó a deprender dalgo de castellán. Entós, cuntó que venía d’un mundu ensin sol, onde les plantes crecíen cola ayuda d’unes esferes lluminoses artificiales y qu’unos díes enantes de la so llegada a la superficie terrestre hubiere una inundación. Esta historia paezse sospechosamente a la de los neños verdes de Woolpit en Suffolk, Inglaterra.

Esta teoría ta rellacionada tamién cola tradición d’Agartha, un reinu formáu por un conxuntu de galeríes soterrañes con capital en Shambala, debaxo del desiertu de Gobi. L’almirante Richard E. Byrd, de la Marina de los Estaos Xuníos, aseguró qu’en 1947, nuna espedición al polu norte, entró na Tierra y entamó contautu col reinu soterrañu. El Rei y la Reina d’Agartha dixéron-y que taben esmolecíos pol so propiu futuru dende que los Estaos Xuníos llanzaren les bombes atómiques de Hiroshima y Nagasaki.

Tovía n’actualidá, o quiciabes sobre manera anguaño, hai muncha xente n’Internet que fala de les combalechadures de los gobiernos pa tapecer tou niciu que pueda dar a pensar na esistencia real d’un mundu soterrañu. Pa dalgunos, Hitler tendría fuxío a la Tierra Güeca al traviés de l’Antártida. Tamién se diz que los ovnis tienen el so orixe nel interior de la Tierra y que los habitantes del centru la Tierra seríen los sobrevivientes de continentes desaniciaos, como l’Atlántida o Lemuria.

Leave a Reply

Your email address will not be published. Required fields are marked *