La cola’l dragón

La fiesta local de la ciudá onde tuvi d’Erasmus, ye la ducasse de Mons conocía tamién como doudou por mor del canciu popular que se canta nesi día (c’est l’doudou c’est l’mama, c’est l’poupée, poupée, poupée). Cuntáronme que se conmemora la batalla que llibró San Xurde escontra un dragón. Esi día tol mundu lleva dos cuerdes al pescuezo, enredaes ente sí, una blanca y la otra, colorada. Ye en branu, polo que les terraces tan toes fuera y trabayen a esgaya.

Pela mañana faen una procesión con una réplica de la catedral fecha d’oru y xoyes per tola ciudá: ye’l xuegu de Santa Waudru. Darréu entama’l xuegu de San Xurde, que ye la representación de la batalla col dragón. El percorríu del dragón peles cais ta acutáu con valles, y alredor d’elles y hasta nel últimu metru cuadráu de la plaza central apíñase la xente. La masa humana que resulta ye ablucante y muévese toa a la vez, como n’oleaes. Entós aporta’l dragón portáu polos sos ayudantes, unos diaños, y persiguíu polos chinchins, los aliaos de San Xurde, y el santu mesmu montáu a caballu. Hai otra riestra de personaxes, caún de los grupos vistíu d’una color concreta y con un papel bien definíu. Los ciudadanos de la ciudá tán tamién na plaza, non solamente pa ver la batalla sinón tamién pa espurrir les manes y garrar pelos de la cola’l dragón, que según dicen, trayen suerte por un añu.

Cuando tuvi yo ehí, fui quién pa arranca-y unos pelos a la cola’l dragón. Unos díes depués tenía esame de traducción francés-español a les ocho y media la mañana. Esi día esconsoñé a les nueve menos venti; llevantéme d’un saltu, vistíme como pudi y baxé los dos pisos d’escaleres que me separtaben de la puerta la casa con un boli na mano, ensin diccionarios nin nada. En zarrando la puerta la cai decatéme de que nun tenía los pelos del dragón. Paecióme motivu abondo pa volver a entrar y subir al cuartu, garré los pelos y fui corriendo a la facultá, hasta onde normalmente tardaba unos venti minutos andando. Llegué mui tarde, pero’l profesor dexóme entrar de toles maneres anque, claro, tuvi munchu menos tiempu del normal pal esame. Aprobar, aprobé, y creo recordar que tampoco nun saqué una nota mala. Les cuerdes blanca y colorada que llevé pal doudou del 2006 tovía tán en Ponferrada xunto colos pelos de la cola’l dragón.

Leave a Reply

Your email address will not be published. Required fields are marked *