Café de la Deutsche Bahn

Pues paez que sí, que n’Alemaña tamién hai fuelgues. Güei, anunciaren, nun diba circular nengún tren ente les seis y les ocho la mañana. Pero la verdá ye que les protestes se dexaron sentir abondo más, según dicen, por mor de los retrasos ocasionaos nes dos hores anteriores. Los carteles de la estación daben anuncia, una y otra vez, de los viaxes programaos que les voces diben anulando ún tres otru. De los mios quitaron cuatro, el cabero d’ellos a les 9:48. Tuvi en total dos hores y cuartu dando vueltes ente los andenes y el puntu d’información, onde quixeron compensame con un vale de dos euros pa una de les cafeteríes del llugar. Vi xente a la que-y daben un papelu y entrúgome si nun seríen xustificantes pal trabayu. Porque eso sí que nun taría mal.

Nestes situaciones dispútense en min les mios conciencia gremial y solidaridá cola mio más bien escasa paciencia. Sobre too si tenemos en cuenta qu’ayeri mesmo quitaron non ún sinon dos trenes colos que podía tornar pa casa y llueu el tranvía col que fici un tramu tuvo venti minutos paráu na nueche. Too ello, ensin necesidá de fuelga dala.

Será que non too n’esti país ye puntual. Y que trabayadores descontentos hailos en toes partes. No que cinca les fuelgues, digo yo, habrá que tentar d’entender a los maquinistes, café en mano, por cortesía de la Deutsche Bahn.

Leave a Reply

Your email address will not be published. Required fields are marked *