Influyencia

Lo que pa munchos pue paecer activismu ye pa mi puru sentíu común. Si voi a una manifestación escontra la enerxía atómica ye porque me paez lóxico oponese a ello, non porque seya ecoloxista. Dalgo asemeyao pásame col coleutivu de persones homosexuales, bisexuales, transexuales, intersexuales, etcétera: nun soi activista pero indígnenme les permunches situaciones de discriminación o prexuicios que siguen viviendo anguaño.

La selmana pasada pasóme dalgo que me fizo pensar. Tenía gana de dicir daqué, pero a lo cabero nun lo fici, más por medrana qu’otra cosa. Taba nel ximnasiu, depués de salir de la ducha, y cabo mi había unos rapazos que tuvieron nel cursu de yudu d’esa tarde. Ún debía de tener unos venti años y los otros dos unos catorce. Paez qu’ún de los más mozos tenía una marca nel pescuezu y dellos ficieron chancies suxiriendo que yera un chupetón. El mayor dixo darréu: “Bono, bono, siempre y cuando nun seya d’un chaval…”. El mozu nun paeció especialmente firíu, pero tampoco contestó al intre y depués retrucó: “Non, si ye d’una abeya”. Les chancies nun siguieron, nin naide s’agredió nin s’ofendió abiertamente, pero yo quedé pensando.

¿Qué pasa si esi chaval, o quiciabes el que taba al llau, tien duldes sobre la so sexualidá o direutamente ye gai? Depués d’un comentariu como ési, nun va atrevese a lo dicir y pueque hasta se sienta mal por mor d’ello. Amás, el mayor, quiera ún que non, sirve de dalguna manera como modelu pa los más mozos, especialmente nun grupu de deportes como ési, onde tien una cierta autoridá, col so cinturón prietu y la so esperiencia. Lo qu’él diz, poro, ye mui importante pa los más pequeños, y tenía que tar dando exemplu más bien de tolerancia y respeutu y non de despreciu y prexuicios.

Esta mena de comentarios ye, pa la mio idea, la qu’en definitiva más prexuicios tresmite y más perxuicios provoca, sobre manera na xente más mozo. Yo planteguéme la posibilidá d’intervenir, de dici-y al mayor que nun diga eses coses, o bien de dici-y al más mozu que nun-y ficiera casu. Tamién pensé qu’una cosa bona que se podía facer yera falar col monitor del cursu de yudu, non pa que tocara’l tema nel entrenamientu, pero sí que tentara de facer en dalgún momentu un comentariu opuestu. Al fin y al cabu, l’entrenador tamién tien la so autoridá, y si-yos cunta a los rapazos, con naturalidá y discreción, que’l so compañeru d’entrenamientu ta acabante de casase col so noviu, eso tamién diba tener un efeutu sobre ellos.

En cualesquier casu, llama l’atención la influyencia que puen exercer les persones los demás. Da un pocoñín de mieu.

One thought on “Influyencia

  1. Ricardo

    Nuna charra que diemos la mio socia y yo nun colexu sobre educación sexual (falando de temes como la homosexualidá, heterosexualidá y transexualidá) con rapacinos de 10 a 16 años pasónos daqué paecío. Siempre hai más o menos la chancia y les sonrises perbaxo, anque tengo que dicir que se portaron, en xeneral, tolos cursos mui bien. Sicasí, decatémonos qu’había rapacinos y rapacines que, lloñe de rise o tar al marxe de la clas, abríen bien los güeyos y escuchaben con verdaderu interés lo que-yos tábemos contando.

    Cierto ye lo que camientes na to entrada. Cierto qu’entovía hai comentarios homófobos ente la mocedá que manquen más de lo que paez a la xente que nun se siente identificada colos modelos masculinos que-y tresmite’l so entornu. Pero tamién ye cierto que cuando yo diba a escuela enxamás naide vieno a dame charra nenguna sobre esti tipu de coses, dafechu tabú. Asina les coses, si polo menos hubo ún escolín o escolina a la que-y valió como tabla de náufragu pa sintise un pocoñín menos raru o rara esa charra, yo doime por contentu.

    Per otra parte, dafechu d’acuerdu cola otra idea del blogue. Yo cuando me manifiesto fáigolo tamién por tar d’acuerdu col manifiestu, non necesariamente porque seya d’aplicación a mi o al mio país. Dígotelo yo, que dende la heterosexualidá, tuvi dando charres favoratibles a la llibertá na escoyeta d’orientación sexual (anque foi por trabayu, tuviera dáoles igual si se me tuviera dao la oportunidá). Prestosu blogue. Saludos.

    Reply

Leave a Reply

Your email address will not be published. Required fields are marked *