Babayes sobre’l sexu

Cuando taba en séptimu de primaria (n’Arxentina la primaria yera, al menos daquella, de nueve años), tuvimos una clas d’educación sexual. El maestru encargáu de facela llamábase Julio Nakhlé, pero esi día fizo la mesma chancia que cuando se presentó como tutor de grupu: dixo que nun yera Julio, qu’esi yera’l so hermanu, él llamábase Agosto Nakhlé. Creo que pa esa ocasión nos punxeron a los mozos por un llau y a les moces por otru. Esa yera, si nun m’equivoco, una de les razones poles que nos daba él la clas: que yera un home. Pero había otres dos, según nos dixo. Per un llau, el fechu de que yera maestru de ciencies naturales, conque tenía conocimientos de bioloxía abondos pa desplicar les cuestiones téuniques y, per otru, que tenía dos fíos, conque sabía de lo que falaba. Yo entruguéme si yera que la xente que nun tenía fíos nun sabía nada de sexu como pa poder cuntánoslo.

Nun m’alcuerdo de demasiaes coses d’esa clas, pero sí d’un par d’elles. De lo que sí me decaté yera de que tolos mios compañeros se facíen los chulinos, que yá se les sabíen toes, pero en realidá prestába-yos pola vida tar ehí y escuchar por fin a dalguién falar d’eso. El mio amigu Marcelo taba tiráu cola cabeza apoyada sobre los brazos cruzaos enriba la mesa y díxome cuando salimos qu’él nun deprendiera nada, qu’eses coses él ya les sabía.

El maestru entamó a danos lleiciones pseudocientífiques sobre les diferencies ente l’home y la muyer. Paeció-y importante destacar que l’home tien forma d’V y la muyer, como d’8 y pa ilustralo fizo un dibuxu nel enceráu. Otra cosa que nos dixo, y tovía anguaño nun soi a pescanciar les dimensiones d’imbecilidá del paisanu, tuvo que ver colos métodos anticonceutivos: “Yá vos dixi que tengo dos fíos; entós taréis entrugándovos: ‘¿Entós, el maestru Nakhlé sólo tuvo rellaciones dos vegaes?’. Y la rempuesta ye: non, faise más veces”. Desplicónos entós, y escontra tou pronósticu, por qué nun usaba condones: paecía-y egoísta. Nun emplegó estes pallabres, pero vieno a dicir que la muyer nun disfruta del sexu si usa un preservativu, colo que daba a entender que lo que-y produz un orgasmu a una muyer ye sintir el semen del home dientro de sigo. Menos mal que yera científicu… Lo que facía entós, por si quedaba la dulda, yera achucase cola so muyer nes selmanes non fértiles nel ciclu menstrual.

Bien pensao, esa ye una manifestación poco evidente pero mui fondera del perafitáu machismu del que se sigue faciendo gala en munchos llugares: la muyer necesita al home en tou momentu. A mi quedóme’l consuelu de pensar qu’en realidá Julio Nakhlé yera cenciellamente babayu y la so muyer, mui llista, que se ría d’él diciéndo-y eses coses sobre les muyeres, de les que nunca nun diba saber un ris.

Leave a Reply

Your email address will not be published. Required fields are marked *