Vienres de pizza

Los vienres yeren el día de cenar pizza en casa. La pizza de mio güela ye la meyor qu’enxamás probé y toi convencíu de que nun esiste otra que seya meyor, nel so sabor, nel so grosor o no cruxente de la masa. Hasta anguaño nun hai visita que-y faga ensin qu’haya un día de pizza.

Los vienres de la mio neñez facía non pizzes, sinón “pizzetes”, como minipizzes individuales. Caún tenía una y había si acaso una o dos más, por si dalgún quedaba con fame. Polo xeneral pasábemos la mio hermana y yo con un papelu entrugando a tol mundu con qué queríen la so pizza. Eso nun tardó en tornase nun xuegu nel que yéremos los camareros d’una pizzería. Non poques veces rabiábemos a mio güela porque ufiertábemos ingredientes que nun había o que suponíen más trabayu o dalguna desventaxa (siempre había, por casu, maíz, pero si’l bote taba zarráu nun pagaba la pena abrilu namái que pa una pizzeta).

Amás, cuando facía pizzes grandes, tampoco pue dicise que fueren normales. Daquella, Pizza Hut sacó la rolling pizza, que tenía’l borde rellenu de quesu. Eso entamó a facelo tamién mio güela (Yoli), y nomámosla yoling pizza. Más alante entamó a facer otra con base doble rellena de quesu, que creo que la viera tamién en algún anunciu de Pizza Hut, Telepizza o dalguna d’eses cadenes.

Yo deprendí a facer la pizza de mio güela cuando tenía alredor de 10 años. Tengo una semeya de cuando mio madre foi a Arxentina nel branu de 1998 pa dir faciendo coses pa cuando fuéremos toos en diciembre, na que salgo estirando la masa. Quixeron faceme la semeya p’amosar a los parientes que yá cocinaba a esa edá y el resultáu foi penosu: nótase a la llegua que me duché xustamente pa la semeya y salgo posando con una sorrisa de pazguatu.

Leave a Reply

Your email address will not be published. Required fields are marked *