Nomes

La xente tien el vezu de pone-yos nome a coses a les que yo enxamás nun-yos lu pondría. En verdá, la idea paezme entrañable y divertida, pero nun soi quién a topar nomes afayadizos porque llega un momentu nel que me siento ridículu. Mio hermana, por exemplu, nomó a la so bicicleta Rosaura y diz coses como “Tengo reparar a Rosaura” cuando non “Rosaura ta malina”. Yo tamién tenté de da-y un nome a la mía, pero nun hubo manera.

Más normal ye, creo yo, pone-yos nome a los peluches, anque eso tampoco lo fago. Cuando mio pá foi per primer vegada a España, nel añu 1990, como pa dir preparando les coses pa la nuesa llegada, dexónos a los mios hermanos y a mi un osín de peluche a caún, toos de colores estremaes. El de mio yera’l marrón. Tien yá más de veintiún años y cuasique tol que lu ve entrúgame cómo se llama: siempre tengo dicir que nun tien nome, pero a cambéu cunto la historia del so orixe, como pa compensar. Depués de too, llevélu siempre auquiera que tuviera.

Cuando yéremos neños, tenía tamién un peluche en forma sandía. La mio hermana tenía una naranxa y el mio hermanu, un llimón. Esti últimu llamábase Jack Lemon y tengo reconocelo, eso sí que me prestaba pola vida. El mio hermanu cuntóme tamién qu’un rapaz de la so clas punxéra-y güeyos, ñariz y boca a un paragües prietu y diéra-y un nome, pero yá nun m’alcuerdo de cuál.

Una cosa que tengo que sí tien un nome estremáu del normal ye l’iPod Touch, que ye a tolos efeutos l’iFede. Sicasí nun pue dicise qu’esti seya’l so nome nin un nome propiu, porque de fechu digo “Apúrrime l’iFede” y non “Apúrrime a iFede”. Tola xente que me conoz sabe esto y emplega’l nome oficial del iFede. Y eso faime muncha gracia.

Leave a Reply

Your email address will not be published. Required fields are marked *