Phoskitos

Cuando yera neñu teníemos un armarín nel salón onde se guardaben toles llambiotaes. Yeren coses pa depués de la xinta o la cena y nunca faltaba dalgún turrón del añu anterior. Ehí guardábense los Phoskitos. Los Phoskitos veníen en caxes de cuatro y, como yéremos tres hermanos, tocábemos a 1 1/3 caún.

Un día fui a casa d’un compañeru de la escuela depués de clas. Yera daqué cobarde, pero bon rapaz. Llegara nuevu y dacuando paecía que-y costaba un migayín facer amigos, anque nós llevábemos perbién. Vivía na cai Asturias d’Uviéu y el pisu abultóme abondo escuru. Alcuérdome muncho d’esa visita por dos coses: una d’elles foi qu’entamó a falame de les sos aventures coles moces. Teníemos los dos ente diez y once años, conque les coses que me cuntaba yeren mui novedoses y me sorprendíen bastante. Nun sé si me dixo que durmiera una vez con una o que cenciellamente se besaren. L’asuntu ye que tábemos sentaos nel suelu’l cuartu y llevantó la mano pa dar un par de palmadines a la cama y dicir: “Equí foi, ye la escena del crime”. Esa imaxe téngola pergrabada na mente.

La otra razón pola que m’alcuerdo d’esa visita ye que la merienda que nos traxo so ma me paeció tou un lluxu. Entró nel cuartu y punxo enriba una mesa los Phoskitos: dos pa caún.

Leave a Reply

Your email address will not be published. Required fields are marked *