Una de crema y otra de chicolate

Dacuando abúltame triste nun poder facer cola vida lo que los direutores de cine faen coles sos películes. Yo por exemplu diba facer de la mía un musical.

Saldría de casa d’un saltu y nel intre mesmu nel que tocara’l suelu entamaría a sonar la música. Entós podría andar peles cais camín de la panadería mentres tola xente que vaya perhí me fai los coros y me bailla alredor. Na panadería pediría cantando: “Dos napolitanes, por favor, una de crema y la otra, de chicolate”. El primer númberu diba acabar con un planu de min llegando otra vuelta a casa, garráu del marcu la puerta y cerrándola a les mios espaldes.

Les posibilidaes son, bien mirao, infinites. Na parada’l bus, al espertar, pa sirvir la cena… Basta con echar una güeyada a la cantidá de cantares qu’esisten. Si dalguién ye a escribir una canción sobre una pestaña, malo será que nun puea topase inspiración na vida cotidiana.

Hai yá tiempu díxome ún que nun-y veía’l xacíu a los musicales y que-y paecíen absurdos, que pa qué dicir daqué cantando si pue dicise falando normal. Llamóme l’atención porque yo pensara xustamente lo contrario: si pue dicise cantando, pa qué dicilo falando. Qué maneres tan estremaes de ver les coses…

One thought on “Una de crema y otra de chicolate

Leave a Reply

Your email address will not be published. Required fields are marked *