Lluxu y basura

El vuelu que me lleva a Asturies y llueu de vuelta a la vida tien como destín n’España l’aeropuertu de Santander. Nel trayeutu de vuelta, poro, dispídome dende’l bus y non na puerta d’embarque. Como’l vuelu sal demasiao ceo, amás, tengo tomar el Alsa Supra, un inventu d’esos polos qu’hai que pagar más, porque col normal pierdo l’avión.

Esti serviciu consiste nuna riestra de ventayes respeuto del serviciu normal del autobús: los sillones son más cómodos, dante periódicos pa lleer y hai una moza toa uniformada qu’atiende delles de les tos necesidaes. Nun ye que me paeza mal qu’esista dalgo asina: caún fai coles sos perres lo que-y peta y, si a otros-yos paez que paga la pena gastase más por tener eses caxigalines, son mui llibres de lo facer. Nun tan bien me paez, d’otra miente, que yo, que voi percontentu nel bus normal de tola vida, tenga que facelo porque si non llego tarde al avión.

Lo que sí que nun soi pa con ello ye l’espilfarru que paez tener convertíose en sinónimu de lluxu. El serviciu de catering (cómo nos presten les pallabres inventaes) que-y ufren al pasaxeru consiste básicamente nun bocadillín diminutu ya industrial, qu’eso nun ye xamón nin lo otro quesu, y una bebida. Pero el problema nun ta ehí, sinón na parafernalia qu’arrodia’l repartu de la comida: primero pasa la moza abriendo les bandexes de los asientos de los pasaxeros pa pone-yos un mantel de papel cortao a midida y con publicidá d’Alsa. Darréu entruga a la xente qué quieren pa beber y va llevándo-yos el bocadillín nun paquetín de plásticu y el café, el té, l’agua o’l refrescu qu’escoyera caún. Ello va acompañao d’una serviyeta de papel demasiao grande pa lo que se come y una cucharina tamién de plásticu metida nun embalaxe del mesmu material.

Visto asina pue paecer poco, pero a lo cabero, cuando toos yá comieron los sos inventos alimenticios, pasa la moza otra vuelta con una bolsa de basura y va metiendo tolo que sobró ehí: papel, embalaxes, sobres… too xunto nunca bolsa que-y llega por enriba la cintura. Una cantidá tala de basura pa qu’un puñáu de pasaxeros tuviera un bocadillín y dalgo de beber.

Una vez, tando pa llegar al destín pasaron repartiendo regalos. Enxamás nun viera una cosa más ridícula: una bolsina azul con un paquetín (de plásticu) dientro. Nél había una especie de cepillu azul que se guardaba nun cascu y se sacaba apertando pola parte d’abaxo. Cuando me dieron eso baxé del autobús y fui a la ventaniella d’Alsa pa entrugar qué demónganos yera eso y pa qué me lo daben. Ye producción consciente de basura que nun sirve pa un res. Eses coses contaminenn cuando les fabriquen y acaben convertíes n’esperdicios que van siguir contaminando sieglos y sieglos.

Ye que si ún nun xenera basura, nun tien la sensación de lluxu.

Leave a Reply

Your email address will not be published. Required fields are marked *