Xente rarino

Esmoléceme muncho la discriminación que sufren dalgunes persones por mor de la so forma de ser, la so identidá o les sos condiciones. Si dalguién ye estranxeru, negru, muyer, xitanu, gai, sordu… pero esmoléceme sobre manera la situación d’un grupu, non porque se los discrimine más qu’a los otros, sinón porque nun esiste tanta conciencia al respeuto y afeuta a munches más persones de lo que se creye: toi falando de la xente rarino. Uno de los problemes que tien esti tipu de discriminación ye la so definición: ¿qué ye ser rarín? Ye difícil de desplicar, pero lo que ta claro ye que suelen ser xente con dificultaes pa rellacionase colos demás. Nun ye estraño topalos ente informáticos, anque esto nun ye n’absoluto una condición. Reconózselos munches vegaes namái que pol so aspeutu físicu o nos cinco primeros minutos de charra, lo que los fai una víctima perfeuta de discriminación.

Conozo munchos rarinos por dos coses: en primer llugar, falo esperantu, y les comunidaes esperantistes son un fervedoriu de rarinos. Ye como si nel mundu normal nun gociaren de nenguna aceutación, daqué que sí topen dientro del movimientu esperantista, y ehí multiplíquense. En segundo llugar, trabayo nuna empresa de videoxuegos. Magar que xugar videoxuegos nun ye esclusivo de xente rarino nin tolos rarinos lo faen, ye como si’l porcentaxe d’estes persones medrara un poco en rellación col restu’l mundu. Y col tamañu que tien la empresa, acaba siendo muncha xente.

Too esto dígolo dende’l más profundu respetu por estes persones. Pue paecer risondero pero nun lo ye: ye un problema perserio. Conozo una rarina alemana que pasó años y años viviendo d’aidas sociales porque se-y acabó’l paru y naide nun-y daba trabayu. Tien dos llicenciatures, fala delles llingües, ye responsable y ta perfeutamente preparada pa trabayar nel so ámbitu. Pero ye rarina: fala mui sele, tien dalgún problema de dicción y amás camina estraño por un accidente que tuvo que-y dexó la espalda tocada. Ye normal que dea una impresión mala nes entrevistes.

Na ciudá na que vivo hai un 5% de desemplegu. Y, sinceramente, tengo mieu de que seyan toos rarinos.

Leave a Reply

Your email address will not be published. Required fields are marked *