El mio tíu Carlos

Cuando tenía diez o once años, conocí al mio tíu Carlos, qu’en realidá ye, como primu de mio pá, tíu segundu. Él trabayaba nun barcu y esi añu vinieron a El Ferrol a lu facer reparar, conque aprovechamos pa visitar Galicia y da-y al mio tíu una pila maletes y bolses con coses de nueso pa que llevara a Arxentina, porque pa entós yá taba tomáu’l determín de mudanos. Efeutivamente, llevó bolses con platos y llibros y tovía tienles guardaes en Buenos Aires porque nunca nun fuimos buscales.

Yo digo que lu conocí entós porque ye’l primer recuerdu que tengo d’elli, anque pue ser que él me conociera a mi d’enantes. Paecía tar siempre de bon humor y facía chancies. Munches coses quedáronme grabaes na memoria. Un día, por casu, fuimos a un sitiu a cenar y él pidió una hamburguesa. A lo cabero, quedába-y ún de los panes y en vez de lu comer garró la botella ketchup y dexó un mensaxe d’amor pa la camarera formáu pol pronome “te” siguíu d’un gran corazón.

Tamién llevónos al barcu, onde teníen una d’eses máquines de los restaurantes de comida rápido pa echar les bebíes carbonataes ya convidónos a sirvinos tantes vegaes como quixéramos. Llueu siguimos cola visita guiada y pasamos por un cuartu onde había un póster d’una muyer coles tetes al aire. Pasó ensin dicir al respeuto namái que “y esto, bueno, intereses de marinero…”. Cuntónos tamién, cuando aportamos al cuartu esi nel que tienen el timón, qu’una vegada grabaron un videu con una cámara que tenía dalguna suerte d’estabilizador xustamente cuando la mar taba revuelta. El resultáu foi que la imaxe taba fixa pero les coses volaben de les estanteríes, como si tuvieren poseyíes. Siempre quixi ver esa grabación.

Gracies al mio tíu Carlos tuvi tamién el mio primer contautu colo que diba ser la fala coloquial de los de la mio edá n’Arxentina. Aseguró tar confundíu polos vezos que diben adautando los fíos y el xeitu nuevu que teníen de falar cada vegada que tornaba d’un viaxe. Lo último yera, según dixo, cuando fueron a ver bicicletes a una tienda y el fíu dixo “Esta está re-cool, papi”. Nun supi si lo raro yera’l re o’l cool.

Mio pá cuntónos daquella que’l mio tíu y el so hermanu teníen una competición a ver quién se casaba más veces. Al paecer, ún d’ellos tuviera casáu (o amontonáu, como se diz na mio casa, ye dicir, conviviendo ensin tar casáu) con cuatro o cinco muyeres y l’otru, con dos o tres. Ta claro que mio pá tentaba de ser gráficu pa desplicar que camudaben de pareya como de camisa, pero dellos años quedé cola idea de que daveres competían pa ver quién casaba con más.

Leave a Reply

Your email address will not be published. Required fields are marked *