Primeros recuerdos

Dacuando paezme que los científicos tienen un nome pa too, conque seguramente tendránlu tamién pal periodu esi qu’hai ente’l momentu d’ún nacer y el primer intre del que se tien recuerdu depués. Nun sé cuánto tiempu se supón que tien pasar, pero siempre tuvi la sensación de que nel mio casu duró más de lo normal.

Pémeque lo primero que recuerdo por méritos propios ye’l nacimientu d’Augusto, el primer fíu d’unos amigos de mios pas que, si nun m’equivoco, nació en xineru de 1992. Tamién tengo un recuerdu remotu, favorecíu seique por una semeya que siempre tuvo per casa, d’un día nel que vinieron de visita Stella y Miguel y traxeron plastilina de colores. Tuviéronnos tola tarde faciendo figurines que llueu-yos vendimos por 25 pesetes. Foi un bon día.

Avezo midir los acontecimientos según parámetros estremaos, anque nun ye infrecuente facelo según ónde vivíemos. Y creo que’l día de la plastilina foi nel primer pisu nel que tuvimos n’Asturies, na cai León y Escosura.

Depués tán les coses de les que nun m’alcuerdo pero qu’oyí tantes vegaes que soi a lo contar como si supiera de qué va. Son anéudotes como la vez que caí de cabeza dende la cuna encima un camión de xuguete del mio hermanu. Cascó’l camión, yo fici una brecha (tovía tengo’l repulgu na ñariz, a l’altor de los güeyos) y el que lloró foi’l mio hermanu. O esa costume qu’al paecer tenía de m’abrir la cremallera del chándal (verde) y baillar como si fora Michael Jackson. O dir andando perhí coles manes trés el cogote y los coldos n’alto y que viniera’l mio hermanu, m’emburriare malapenes con una mano y yo caer p’atrás sin facer por evitalo por nun quitar les manes d’onde les tenía. Son toes coses que me presta evocar, anque nun soi a recordales yo mesmu, magar que lo de baillar tien de ser bien entraos los años noventa.

Podía dir a dalgún estudiosu, sicólogu o analista de la mente humana y dici-y que los mio primeros recuerdos son de cuando tenía ente cuatro y cinco años, que de xuru que ye quien a sacar conclusiones d’eso.

Leave a Reply

Your email address will not be published. Required fields are marked *