Nel cuartu

Cuando yera pequeñu compartía’l cuartu colos mios dos hermanos. Nun yera, amás, un cuartu grande. Tenía a un llau una llitera y nuna esquina una cama-ñeru. Yo dormía na cama d’abaxo de la llitera, mio hermanu enriba y mio hermana na cama-ñeru que rinchaba toles nueches pa la baxar. Quedaba asina una paré llibre au poníemos los nuesos xuguetes embaxo y que teníemos dividida en tres partes, pa que toos tuviéramos el mesmu espaciu. Por embargo, nun yera estraño que les Barbies de mio hermana fueren conquistando territoriu pasín ente pasu, avances que diben afitando con coches camperos o cases-maletu, nel xeitu de la Reconquista.

La ventana’l cuartu yera corrediza y daba pa bien d’hores de xuegu. Una posibilidá yera poner les dos fueyes metanes el marcu, asomanos ún a cada llau y miranos sacando namái que la metá de la cara pa facer biecos xugando col reflexu nel cristal de la ventana. Si non, moyábemos l’alféizar y preparábemos un poco d’agua con xabón pa facer castiellos de burbuxes que dacuando llegaben a niveles de complexidá dignos de mención.

Nel cuartu teníemos tamién una tele pequeñina na que nun podía vese nengún canal, pero que taba ehí con otru propósitu: el de xugar a la Nintendo. Tuvimos tres xuegos: Punch Out!, Super Mario Bros. y Snake Rattle ‘n’ Roll. L’otru que xugábemos nun sé si yera emprestáu o de nueso. Yera ún de béisbol nel que cada vegada que se cambiaben los equipos ente defensor y atacante apaecía na pantalla la pallabra “Change”. Nós lleíemoslo en voz alta a mou d’anuncia y pronunciáu [‘ʧ̑aŋge] y darréu canturriábemos “changa, changa, changa, changa”.

Les mantes de les tres cames yeren del mesmu modelu pero en colores estremaos. Mio hermanu teníala n’azul, mio hermana en rosa y yo en verde. Una vez quixi adornar un poco’l cuartu, o más bien la mio cama, y tenté de pintar la bandera d’Arxentina. Como yá la pintara otres vegaes con dos bandes azules sobre’l papel blanco, fixi lo mesmo, anque’l resultáu foi bien distinto: la madera yera marrón. Cada vez que m’alcuerdo d’eso siéntome fatu dafechu.

Dende la ventana víase la nuestra escuela, La Ería, hasta que construyeron ehí otra filera de pisos, como-y dio por facer a tol mundu n’España va dellos años. Tengo delles semeyes que sacó mio pá dende ehí demientres nós xugábemos al fútbol y se nos podía ver. Agora, camiento, se verá a dalgún vecín, lo que según el casu pue ser fonte de más o menos entretenimientu.

Leave a Reply

Your email address will not be published. Required fields are marked *