Descubriendo’l sexu

Aporta na vida de tou padre’l momentu de falar de sexu colos sos fíos. Yo nun soi padre pero tengo entendío que a munchos-yos cuesta abondo. Obviamente, ye dalgo polo que pasen tamién los fíos y eso sélo meyor, anque a mi nunca me tocó.

Cuando’l mio hermanu cumplió 14 años, mios pas regalaron-y un llibru nomáu daqué como “La sexualidá humana”, nel que se trataben toos esos temes. Nesi intre diome la impresión de que’l mio hermanu se sintiera mui incómodu con eso ente les manes y énte toos nosotros, dalgo que pueo pescanciar perfeutamente. Nun se faló más del tema y el mio hermanu guardó’l llibru nel so cuartu. Daquella vivíamos nun pisu de tres cuartos normales y llueu, pasando la cocina y un balconín interior, un cuartín más con bañu, d’esos pal “serviciu”, que nós naturalmente nun teníemos. Esi convirtióse nel cuartu del mio hermanu, pa envidia de los demás.

Nun sé si’l mio hermanu llegó a lleer esi llibru, pero sí me tomé la llibertá de lleelu yo, anque nun tenía del too claro si “podía” o yera tovía demasiao mozu pa eses coses. De toles maneres, yo quería saber cómo funcionaben les coses y entamé a buscar escuses pa dir al bañu del mio hermanu, aprovechando cuando los demás taben ocupaos, garrar el llibru y lleer ehí les partes que más m’interesaben. A poco que la mio familia punxera cuidáu, tiense tener decatao de lo que facía o pensao que tenía graves problemes gastrointestinales.

A lo cabero nun topé gran cosa neses páxines y a mi nunca me tocó pasar por nengún momentu d’esclarecimientu biolóxicu colos mios pas, sinón que fui deprendiendo coses col tiempu. Nos últimos años vi espublizaciones estremaes que traten el tema de la sexualidá pa un públicu mozo, dalgo que veo muncho más afayadizo que l’enfoque científicu del llibru del mio hermanu, y en formatos de toa mena: folletos, llibros, programes d’interné… y campañes d’información, tamién destinaes a grupos más específicos, como gais y lesbianes adolescentes. Dende llueu, paez mentira qu’una cosa como’l sexu, que se ve tanto y d’una forma tan esplícita, siga siendo tan tabú. Llueu queden asoraos de qu’haya neñes de 15 años con fíos.

Leave a Reply

Your email address will not be published. Required fields are marked *