Deuda

Quiciabes una de les coses que peor me fizo sentir cuando morrió mio güela materna foi que quedara-y debiendo una semeya d’un caballu que pudiera emplegar como modelu pa dalguna de les sos manualidaes. Facía munches coses, anque yo llegué a ver poques porque nos separtaba un océanu. En cualesquier casu, una cosa que sí recuerdo ye’l so belén con rollos de papel hixénico. Pintáralos, ficiéra-yos vistidinos y perruquines y punxéralos nel salón. Mio pá llamó una vegada a la radio a un programa nel que taben falando de belenes raros que facía la xente pa Nadal pa cuntar esto y llueu díxonos arguyosu que camentaran a la final del programa que la de so fuera una de les meyores contribuciones.

Mio güela pidióme una vegada una semeya d’un caballu y como daquella interné nun yera lo que ye anguaño, pidí-yla a la mio amiga Naty, qu’entós tamién taba a un océanu de distancia y que dibuxa perbién. Nel primer intentu, ye dicir, na primer carta que m’unvió depués de que-y lo pidiera, dixo que nun lo llograra, pero a cambio me facía un Piolín n’A4 (que, obviamente, aína tengo guardáu). Creo qu’en dalgún momentu sí llegó a me facer el caballu, pero yo nun llegué a lu dar a mio güela. Morrió cuando nós ya tábemos otra vuelta n’España.

Si la vida fora una película, yo viviría atormentáu pol recuerdu de mio güela hasta’l día en que tornara a Arxentina y dexara una semeya d’un caballu al galope sobro la so tumba. Por suerte, nun tamos nuna película. Dame pena, échola de menos y quería más que non morriera, pero la vida sigue. Quédame saber que, magar toles sos zunes, yera una muyer fuerte a esgaya que foi quien a plantar cara a la so enfermedá más d’una década. Esa tenacidá queríala más d’ún pa sigo.

Leave a Reply

Your email address will not be published. Required fields are marked *