La paciencia del caballu

Nun soi especialmente duechu coles pallabres. Soi seique demasiáu llóxicu: nuna fras préstame más poner cuidáu a los pronomes y les rellaciones sintáutiques qu’a les semeyes lliteraries y nun párrafu miro más por nun repetir palabres que por da-y un ritmu al testu. Asina ye que lo que voi cuntar sedría quiciabes muncho más bello si lo escribiera un escritor, un lliteratu, dalguién que nun fuera yo. Pero, como suel dicise: ye lo qu’hai.

Ayeri vi una cosa que me dexó plasmáu. Pue que seya una tontura, pero a mi paecióme poco menos qu’una maraviya. Taba dando un paséu en bici al sur de la mio ciudá cuando les nubes, qu’entamaran a zarrase seliquino unes hores más ceo, dexaron de llau el so disimulu y garrónos la lluvia metanes la nada.

Ellí taba yo, con tol costáu, tola pierna y tol brazu izquierdos pingando y fríos, cola cámara fotos metía na chaqueta del llau drechu pa que nun moyara, mentes facía por avanzar daqué, cuando la lluvia me dio un respiru que me dexó llevantar la cabeza un poco. Vi a mandrecha, co’l camín pel que diba, unos seis o siete caballos de pie, ensin mover un pelu, toos mirando al horizonte del mesmu llau, de mou que s’amuesaben nun perfil perfeuto énte mi. Yera como si se punxeren d’alcuerdu pa quedar asina cuando viniera xente y que vieran lo guapos que yeren, por si daquién quería saca-yos una foto o pintalos nun cuadru.

Siguí alantre cola bici y vi que tolos caballos del terrenu qu’había al llau taben exautamente igual. Qué paciencia, pensé, cola lluvia. Yo engarriándome con ello, moyáu y con cutu, y ellos-y dan la espalda y esperen a que pase. Prestábame ser caballu pa poder facer eso.

Leave a Reply

Your email address will not be published. Required fields are marked *