Primeros aforros

Esiste un vezu que pa min siempre foi mui español, anque llueu decatéme de que se fai en munchos países. Quiciabes seya un vezu primermundista: la paga. A los mios amiguinos del cole dáben-yos una cantidá selmanall, munches vegaes por nun facer nada, anque otres por sacar notes bones, lo que me paecía tovía más raro, porqueyoo lo consideraba’l deber de los neños y non unaméritu.. Val que ta bien recompensar los llogros, pero eso nun yera lo que se facía.
Total, que yo nun tenía paga. Si yo o dalgún de mios hermanos queríemos daqué, pedíemoslo y, si taba xustificao y se podía, dábennos les perres pa mercalo.

Nos años caberos enantes de dir p’Arxentina, entamé a pidir tolos díes 100 pesetes a mio ma pa mercar daqué de merienda nuna panadería que se llamaba El horno de La Ería. Depués d’un tiempu pensé que tampoco yera mala idea aforrar un poco y falé con mio ma sobre la posibilidá de que me diera 2000 pesetes tolos meses en llugar de 100 toles tardes. Foi lo más asemeyao que nunca tuvi a una paga, anque nun llegué a lo considerar paga porque, al cabu y al fin, yera yo’l que se taba privando de daqué pa sacar unes perres.

Asina foi como abrí la mio primer cuenta, nel Banco Herrero. Cuando colamos p’Arxentina, nun tuvi tiempu de zarrala (ocupáu como taba colos certificaos de salú pa la mio tortuga y desplicando a los mios collacios lo que yera’l corréu eleutrónicu pa que m’escribieran) conque tuvo qu’encargase d’ello mio ma, que vieno a Arxentina delles selmanes depués. Nun cuadernu que tenía ella p’apuntar les coses importantes vi’l mio nome y al llau un númberu, que creo que yera 10.080. Apuntara ehí lo que-y dieran cuando zarró la mio cuenta pa que nun se-y escaeciera me lo devolver. Cuando vi eso sentíme arguyosu porque me paecía permuncho. A la final nun fueron quién a me lo dar, pero eso ye lo de menos. Agora nin ye tanto nin m’importa demasiao. Quiero más quedame cola sensación de que de neñu nun yera sólo un guaḥe consentíu y desagradecíu, sinón que tamién s’atisbaba un amagu de sentíu de la responsabilidá.

Leave a Reply

Your email address will not be published. Required fields are marked *