Lo que se topa nuna sauna

Nun branu de los qu’había ente un cursu y otru de la escuela, los mios hermanos y yo tuvimos clases de natación nun ximnasiu que nun taba lloñe de casa. Tovía tengo’l diploma guardáu. Nesi sitiu había tamién una sauna que, según me cuntó una amiga d’entós, sirvía pa quemar grases y adelgazar. Pero eso daba igual, porque mios pas nos dixeron que nun podíemos entrar ehí, porque se tresmitíen enfermedaes.

Munchos años depués, cuando taba viviendo nos Países Baxos y m’apunté a un ximnasiu cuasique namái pa tener una razón pa salir del sitiu au vivía, escaecí a conciencia aquelles idees d’enfermedaes contaxoses y fui a la sauna. Al entamu dábame muncha vergoña eso de dir desnudu perhí, que una cosa ye duchase y otra dir pasiando con too colgando ehí abaxo. La primer vegada, de fechu, fui en calzonciyos, pero nun tardé n’avezame y perder el pudor.

Menos pudorosu que yo yera un paisanu que vía dacuando faciendo los sos exercicios. Un día, nel bañu turcu, esa sala con vapor blanco de les saunes, quedamos los dos solos, caún nun requexín. Dalgunes persones tienen la zuna de respirar fondo y tocase pa quitase’l sudor cuando tán na sauna, daqué qu’en dalgunes hasta prohíben con cartelos. Esti yera ún d’esos. Pero quiciabes un migayu estremu: nun se tocaba’l brazu nin el pechu, sinón la entrepierna.

Como pa entamar conversación entrugóme si falaba neerlandés. Dixi-y que sí y comentó la bona temperatura qu’había y lo lekker que se taba. Asentí curtio y nun dixi más. Poco depués siguió tocándose y frotándose’l pene, cuspiándose na mano de xemes en cuando. Cuando entamó a mirar pa mi, paecióme yá abondo y entrugué-y, pa guardar distancies y ponenos al mesmu nivel, si falaba inglés. Contestó que sí, y dixi-y, n’inglés, “pos vas tener que dexar de facer eso”. Contestó “OK, sorry“, gachó la cabeza y nun dixo nin fizo más nada.

Curiosamente, lo que más m’interesó d’esi alcuentru, foi el papel que tuvieron les llingües y non el fechu de que’l bon home disfrutara de la mio compaña. Pémeque mios pas, cuando falaben de les enfermedaes de la sauna, podíen referise a daqué asemeyao a esto.

Leave a Reply

Your email address will not be published. Required fields are marked *