Cantares

Hai canciones qu’asocio a determinaos momentos, según cuándo los escuchara por primer vegada o de forma más intensa. Asina, It’s in your eyes, de Phil Collins ye cuasimente la banda sonora del diariu d’Anne Frank. Esi llibru lleílu, por cierto, tiráu nel sofá nel pisu de la cai Florida, en Salta.

Bicycle Race ye de tar caleyando per Salta ensin rumbu fixu. A You don’t fool me, probe, garré-y manía porque taba na única cinta que llevamos cuando fuimos de viaxe a Cafayate en coche y escuchámosla igual diez vegaes. Un-break my heart, abondo mala, ye de cuando sentía a mios pas discutir pela nueche. El nome, por cierto, nun tien nada que ver con eso, que nun soi tan dramáticu. Speed Demon ye del branu que llegué a Arxentina, n’avientu de 1998. Sí, branu n’avientu. Ça y est, c’est fait y Ne me quitte pas, claramente de Bélxica y Rotterdam, vaya sorpresa, de Róterdam. De la época d’Arxentina ye tamién Desde mi libertad, d’Ana Belén, que por dalguna razón m’espertaba la señaldá por Asturies. Y de Delirium tremens meyor nun dicir nada…

Quiciabes había que poner cuidáu de nun sentir demasiaes canciones bones en momentos non tan bonos, que llueu queden marcaes pa siempre.

Leave a Reply

Your email address will not be published. Required fields are marked *