Metodoloxíes

Una de les discusiones que tengo de cutiu y tamién tento d’evitar ye tocante a la manera que tienen les persones d’educar los neños. Nun soi pa cola idea de pone-y la mano encima a un críu, y siempre que dalguién diz eso de “Una hostia a tiempu aforra munchos males” nun sólo m’enfado sinón qu’amás me siento triste, mal ya impotente. Triste pol neñu, mal porque ye una cosa que diz muncha xente ya impotente porque nun hai nada que pueda facer pa camudalo.

Los argumentos que me da la xente paécenme falaces na mayoría los casos. Eso de “a mi dábenme y salí bien” faime pensar “si dices eso, tan bien nun salisti”. Yá sé que la xente, o eso espero, nun se refier a da-yos palices a los neños, pero lo que yo nun concibo ye siquiera el llevanta-y la mano a un nenu. Magar que nun-yos faiga dañu, esi actu representa munches coses a la vez: violencia, abusu d’autoridá y fracasu (o ausencia) d’un modelu educativu. Yo camiento qu’a los neños hai que tratalos como mayores, sobre too si ún quier que se comporten como talos. Nun puedo imaxiname’l sentimientu d’ablayamientu que tien de sentir un rapaz cuando ve a so pá o so ma dispuestu a da-y un tortazu. Paezme amás un métodu cobarde y sobre too, de xente vago, que nun tien la paciencia pa falar col so fíu y face-y pescanciar que lo que fai nun ta bien. Y si nun lo entiende, nun será culpa del fíu sinón de los padres.

D’otra miente, veo normal que la xente que criaron asina piense d’esa manera, anque tamién hai esceiciones. Yo, dende llueu, nun soi una esceición: a min enxamás nun me punxeron una mano encima, y quiciabes por eso me paeza anguaño una brutalidá. Si facía daqué mal desplicábenme que taba mal y por qué y, si siguía igual, castigábenme. Non poques vegaes tuvi que facer “esame de conciencia”: zarrábennos nun cuartu y teníamos que pensar no que ficimos y cómo fizo sentir a la xente qu’ofendimos. Claro que mios pas s’enfadaben, pero’l pasu a la violencia foi ún qu’enxamás nun se dio. Y yo tamién salí perfeutamente.

Leave a Reply

Your email address will not be published. Required fields are marked *