Relativismu 2.0

Esiste una riestra de coses que me cuesta muncho creyer. Munches tienen que ver con cuestiones científiques, quiciabes porque nun les entiendo del too.

Una d’estes coses ye’l conceutu d’infinitu. L’infinitu supónlo too. Si esiste l’infinitu, tolo demás pierde’l so valir. Nun pue formulase nengún principiu universal, porque si hai infinitu, hai tolo demás, tamién aquello que contradiz cualesquier principiu universal que se pretenda formular. Cuéstame poro creyer cualesquier cosa que me digan, como que nun pue haber vida ensin osíxenu o agua, porque si esiste l’infinitu, significa que la realidá, l’espaciu o lo que seya, sigue y sigue hasta qu’haya un tipu de vida ensin agua nin osíxenu.

Ye un poco como’l teorema de los infinitos monos: si tenemos un monu pulsiando tecles por un periodu infinitu de tiempu cuasimente de xuru finará por escribir tolos llibros de la Biblioteca Nacional Francesa. Efeutivamente, nos esperimentos fechos tocante a esto, topáronse dos fragmentos d’obres de Shakespeare (seguramente porque los ficieron anglofalantes, y na so versión del teorema los monos escriben tola bibliografía de Shakespeare y non llibros de la Biblioteca Nacional Francesa).

Si yá de mano soi abondo escéuticu no que cinca les afirmaciones universales, sólo falta que me den la idea de qu’esiste l’infinitu pa que yá nun vea razón dala pa tentar de saber nada.

Leave a Reply

Your email address will not be published. Required fields are marked *