Ente 19 y 25 depués, Naty

Dende que nací hasta güei camudé de casa ente 19 y 25 vegaes, según se cuenten o non delles estancies curties ensin la idea de quedar ehí pa “vivir”. Nun son poques, non. Dalgunos d’esos cambios fueron, como nun pue ser d’otra manera, al estranxeru, anque a estes altures tamién ye difícil definir qué ye l’estranxeru y qué non. Pero daquella, y eso ye seguro, nun yera cenciello comunicase cola xente qu’ún diba dexando atrás.

Recuerdo concretamente cuando colé d’Uviéu en 1998 pa dir p’Arxentina. Di-yos a los collacios del institutu la mio direición de corréu eleutrónicu que taba acabante de facer con Stella (fedo31@yahoo.es, asina ye como me llamaba mio pá, “Fedo”) y toos quedáronseme mirando confundíos. Que qué yera eso, que-yos diera meyor la mio direición de casa pa escribinos cartes.

La correspondencia más productiva túvila ensin dulda dala con Naty. Tovía anguaño tengo nuna caxa toles cartes nes que nos cuntábemos toles novedaes. Ella facíame dacuando dibuxos y daba gusto ver la so lletra y yo ye güei que m’avergüenzo cuando m’amuesa les míes que tien ella guardaes: too malcurioso y feo. Nuna carta dicía que tenía un vecín puñeteru que-y facía la competencia tocando la flauta cuando ella prauticaba pa clas, y na carta siguiente cuntábame que yera Rober, ¿alcuérdeste, d’él?

Naty ye la mio amiga d’anguaño que conozo dende va más tiempu. Y con ente 19 y 25 mudances en cinco países y siete ciudaes estremaes, eso tien méritu. Naty ye, amás, la que me fizo esa semeya tan perguapérrima que ven enriba. Tanto me prestó cuando la vi, que la fici imprentar en grande y ta colgada nun marcu na paré.

Leave a Reply

Your email address will not be published. Required fields are marked *