Mestura

Hebo un tiempu nel que suañaba munches coses a les que podía ver dalgún significáu. Non que tuviera profecíes nin revelaciones de nengún tipu, pero sí teníen de dalguna manera el valir d’una reflexón al rodiu de daqué concreto.

Pero anguaño paez que nun suaño más qu’una mestura de les coses que pasaron durante’l día, si acaso nos caberos díes, y la mio imaxinación desendolca’l tema como-y peta. Ayeri, por exemplu, falé con una collacia’l trabayu sobre unes moces del so ximnasiu que lleven el pañuelu musulmán mesmamente pa entrenar y sudar, y nun se duchen ehí, sinón que tornen pa casa col pañuelu puestu. Tamién una collacia de la empresa lleva’l pañuelu y nunca nun lu quita.

De la que tornaba pa casa tuvi dándo-y vueltes a esto y alcordéme d’una escena d’una película na qu’unos mozos se burllen d’una rapaza musulmana porque zarapica y se-y cai’l pañuelu. Y pela nueche, como yera d’esperar, soñé cola mio collacia, qu’abría una ventana y-y cayía’l pañuelu a los hombros por mor del vientu. Nesi momentu, agora m’alcuerdo, otra collacia se tapaba la boca ablucada y cuasi con medrana, un xestu que la vi facer ayeri cuando-y cunté que viniera un fontaneru a casa y nos dexara como quien nun quier la cosa un metru del NPD (partíu d’estrema drecha d’Alemaña). Total, que’l mio subconsciente tomó por bona tamién la so reacción pa metela nel suañu. Darréu, la collacia’l pañuelu entamaba a dicinos que nun yera pa tanto, que tien pelo como tolos demás y que nun ye que tea mal-y lo ver, pero qu’ella lleva’l pañuelu porque-y paez bien asina y yá. Dixo tamién que tenía’l pelo roxo (otru alderique mui actual nel mio círculu: los que nel sur d’Europa son roxos, equí son castaños). Ella, efeutivamente, tenía’l pelo más bien castaño y rizao. Siempre m’entrugaraxustamente cómo tendrá’l pelo esta moza. Nun ye qu’agora lo sepa, pero polo menos tengo una semeya que, magar que nun se correspuenda cola realidá, a mi me val. Depués de too, hai munches coses muncho más importantes que la ropa que lleve la xente y el pelo que tenga caún.

Leave a Reply

Your email address will not be published. Required fields are marked *