Suañu de señardá

Lo que ta claro ye que ún camuda a midida que pasa’l tiempu. Los que me conocen d’apocayá nun pensaríen que soi mui místicu y trescendental. D’otra miente, ye posible qu’aquellos que los sos caminos se cruciaron col de mio hai yá más tiempu nun queden ablucaos coles mios hestories de pantasmes, premoniciones o cavilaciones oníriques. Y de suaños va güei.

Suañé que dormía. Taba nel tren que me lleva al trabayu y pasábame de parada ensin dame cuenta. Caí dormíu –mientres dormía na realidá, entiéndese– poco enantes de llegar a St. Ilgen/Sandhausen y fui a parar direutamente, nel xeitu prodixosu propiu de los suaños, nin más nin menos qu’a Ibias. En baxando del tren atopéme ente montes, como al entamu d’una ruta de senderismu. Naguaba por adientrame nes viesques pero sabía que tenía de volver, conque me subí a un tren mui raru, que paecía salíu d’una película del oeste, pa tornar al llugar del que viniera.

Na vida real, esa que namás que de xemes en cuando paez un suañu, yo vengo de más d’un llugar, polo xeneral toi sólo nún y voi camín de nenyures.

Leave a Reply

Your email address will not be published. Required fields are marked *