Choripán

Cuando yera pequeñu díbemos cuasi toles fines de selmana a Güeñu. Comíemos choripán, xugábemos al baloncestu y metíemonos na piscina. Mios pas xugaben tamién al tenis. Tengo munchísimos recuerdos d’eses escursiones. Una vegada, baxando les escaleres pa dir p’allí xiblé per primer vez. Otra vegada, mio pá llanzóme les llaves dende’l descansín hasta delantre la puerta casa, u taba yo. Garréles al vuelu y mio pá felicitóme pola mio habileza y profetizó que diba ganame la vida coles manes, según camentó, porque facía namái que coses bones con elles: balonmano, pizza y garrar llaves que me llanzaben. En Güeñu víemos davezu a Naty, otra arxentina de nacimientu y asturiana d’adopción, qu’un día me traxo les páxines qu’arrancara pa min d’una revista porque nelles había un artículu sobre Michael Jackson. So pa yera aficionáu a la pesca y fabricaba los sos propios cebos un anzuelín diminutu una y otra vez con filos de los colores afayadizos pa qu’acabaren paeciendo inseutos auténticos. En Güeñu disllocó mio hermana’l coldu, vi lo que pa min yera de xuru una culiebra (agora paezme que yera un llimiagu pergordu de colores estrambólicos) y me xugaba la vida na piscina nalando penriba’l filtru que, n’otra piscina y según l’incuestionable testimoniu de Naty, absorbiera-y los intestinos a una neña. Ellí xugaba al baloncestu y fracasaba nel intentu d’introducir el balonmano na familia y tamién pescábemos renacuayos.
Delles veces opino que ta bien Arxentina pa medrar porque se pue xugar na cai. Pero hai que dicir que n’Asturies se pue xugar en Güeñu.

Leave a Reply

Your email address will not be published. Required fields are marked *