Chiripa

La xente ye una fonte inagotable d’anéudotes, y a mi préstenme permuncho les anéudotes. Lo que más gracia me fai ye enterame d’hestories de la mio familia de les qu’enxamás nun oyera nada. Y ese coses hai qu’apuntales.
Resulta que tengo la nacionalidá española de chiripa, y muncho más de lo que creyía. La mio bisagüela yera de Cangas y colara p’Arxentina de mui moza. Ellí creció, casó, tuvo fíos… Lo de siempre. Pero siempre-y quedó la gana de tornar a Asturies. Por mor d’ello, mio güela prometió-y col maríu que la diba llevar de vuelta a ver el so país y allegáu’l momentu, mercaron billetes de barcu pal iviernu (xunetu-agostu) de 1962. Por embargu, nun sé si un día o dellos díes enantes del viaxe, el mio tíu-güelu tuvo un accidente. Pospunxeron el viaxe una y otra vegada hasta que, en pasando un añu, caducaba’l billete y-yos dixeron que o viaxaben o lu perdíen. Pa entós mio güela taba yá embaranzada otra vuelta, pero dixo-y al maríu qu’ella podía dir en barcu de toes formes. Foi asina como mio ma decidió aprucir nel mundiu cuando taben en Madrí, pa beneficiu de tola so descendencia. Gracies a ello, mios hermanos y yo tuvimos la nacionalidá española de magar nacimos y pudimos fuxir d’Arxentina cuando la situación asina lo precisó.
Nun pueo dexar de pensar que lo mesmo que mio ma nació en Madrí, pudo nacer n’Asturies, Brasil o nel mesmu barcu, baxo bandera arxentina. Nesi casu nun diba tar yo equí agora. Sólo porque dalgún paisanu de la compañía de los barcos d’Arxentina (navegolíneas argentinas, digo yo) tuvo por bien que los billetes caducaren a los doce meses y non a los once o a los trece.

2 thoughts on “Chiripa

  1. Laura

    Munches gracies poles tos palabres, Fede, les que pusiste nel mio blogue y les que pones tu equí, que son bien interesantes.

    Reply

Leave a Reply

Your email address will not be published. Required fields are marked *