Una guerra estremada

Enxamás pensé que diba allegrame al lleer que va haber una guerra. Dicho d’esta manera paez abondo crudo, pero ye asina: va una selmana comentaba xustamente en casa que nun pescanciaba por qué naide facía res en Libia.

Yo creo que ún de los problemes ye que soi demasiáu mozu pa tener una opinión formada al rodiu los perestremaos conflictos bélicos qu’esisten. Realmente, les úniques guerres que recuerdo de verdá, y nes que pudi dicir lo que camentaba, son les d’apocayá: Afganistán ya Irak. Y eses nun fueron guerres llexítimes, se pongan como se pongan. Eso foi un poder internacional metiendo la zarpa no que nun lu llamaren, con unos costes humanos descomanaos que, na so mayor parte, nin siquiera fueron d’ellos, sinón del llau los civiles de los países invadíos.

Pero esta vez ye distinto. Claro que m’atristaya ver que la xente en Libia ta morriendo y va siguir morriendo cola ofensiva que tán acabantes d’autorizar les NC, pero l’alternativa ye que Gadafi los mate a toos y pa encima siga oprimiendo a los que seyan a sobrevivir, como bien faciendo dende va años. La intervención de Francia, Reinu Xuníu y Estaos Xuníosss (y agora dicetamién Canadá y Noruega) va ser, o eso dicen ellos y esperamos los demás, en sofitu de la población civil, ye dicir y pa nós ciudadanos de a pie, p’ayudalos a ganar escontra’l tiranu.

La verdá ye que depués d’Exiptu y Túnez, nun m’esperaba esti remonte del poder establecíu en Libia. Los últimos díes paecía, en viendo les noticies, que taba too perdío. Pero non, tovía pue dase la vuelta la tortiella. Nun ye afayadizo, pero dacuando faen falta revoluciones y víctimes, mártires o héroes pa camudar la situación.

Seique seya esta época que vivimos la que cuntemos a los nuesos nietos cuando mos entruguen sobre coses que-yos deprendan en clas d’historia, como lo facía yo sobre la Transición, la caída’l comunismu o la dictadura n’Arxentina y tovía sigo faciéndolo coles vieyes alemanes al rodiu’l nacionalsocialismu.

 

Leave a Reply

Your email address will not be published. Required fields are marked *