Too ye relativo

Quiciabes la fras que más rellaciono con mio ma seya esa de “Too ye relativo”. Ella dizlo como pa xustificar la pluralidá d’opiniones o simplemente pa evitar entrar nun alderique. Pero de dalguna manera paez qu’asumí esto como una verdá absoluta, seique la única que nun ye relativa, de tanto sentilo de neñu. Amás, claro, si lo diz un adultu y, pa encima, ún de los mios pas, tenía que ser cierto.

Foi asina como adquirí ún de los trazos que más irriten a los mios amigos anguaño: la relatividá. A la xente presta-y emitir enunciaos siempreválidos, sentenciar verdaes universales, como por exemplu: ye malo llavase’l pelo tolos díes. Estes frases ye-malo y ye-bono apúrrenme una gran dosis de diversión toles selmanes, sobre manera porque tengo pervisto que lo que nun sitiu ye malo, n’otru ye xustamente lo bono. El exemplu más claru que conozo d’esto son l’aceite y la mantega: los belgas frin con mantega y dicen que facelo con aceite “ye malo”, mentes que pa permunchos españoles ye xustamente al revés.

Esto suelo llevalo al estremu, hasta’l puntu de que una amiga me dixo una vegada: “Anque bono, tu nun crees na evolución, conque da igual”. ¿Que nun creo na evolución? Nun sé d’ónde sacaría eso; quiciabes de sentime dicir davezu: “Yo eso nun me lo creo; nun pue sabese”. Claro que creo na evolución. Lo que yo m’entrugo ye cómo podemos tar tan seguro de que los estraterrestres sólo pueden esistir ellí onde haya carbonu o de que los animales nun tienen tamién llingües complexes como les de nueso, con gramática y un léxicu, sólo que nun les entendemos. Pa min, les úniques coses que puen dicise ensin qu’esista posibilidá d’equivocase son aquelles que tengan como elementos realidaes inventaes pol home mesmu: “Lima ta en Perú”. Val, sí, Lima ta en Perú.

El mio problema coles ciencies ye que tienen una riestra de verdaes o principios inamovibles, pero lo qu’hai que ver ye que munchos d’estos tan basaos namái qu’en hipótesis. El métodu científicu funciona en tanto que se propón una tesis y llueu se la tenta de demostrar. Yo entiendo que seya la manera más práuticaa d’investigar dalgo, pero ye verdá tamién qu’asinas’escluyenn munches posibilidaes, sólo por que nun se-y pasaron al científicu pela cabeza.

Yo nun soi científicu, poro, nun voi dicir cómo habíen de facese les coses porque, con toa sinceridá, nun tengo idea de nada. Pero’l drechu de cuestionalo too nun me lo quita naide.

Leave a Reply

Your email address will not be published. Required fields are marked *